'സ്റ്റാർഡത്തിന്റെ ഉന്നതിയിൽ നിൽക്കുമ്പോഴാണ് വിജയ് രാഷ്ട്രീയത്തിലേക്ക് ഇറങ്ങുന്നത്, അഭിനന്ദനങ്ങൾ'; രാം ചരൺ

തമിഴ്നാട് മുഖ്യമന്ത്രിയായി സ്ഥാനമേറ്റതിനു ശേഷം നിരവധി സിനിമാതാരങ്ങളാണ് വിജയ്‌യെ അഭിനന്ദിച്ച് രംഗത്തെത്തിയത്. ഇപ്പോഴിതാ തെലുങ്ക് സൂപ്പര്‍താരം രാംചരണും വിജയ്‌യെ അഭിനന്ദിച്ചിരിക്കുകയാണ്. പുറത്തിറങ്ങാനിരിക്കുന്ന ചിത്രം 'പെദ്ധി'യുടെ പ്രചാരണാര്‍ഥം തമിഴ്നാട്ടില്‍ എത്തിയപ്പോഴാണ് രാംചരണ്‍ വിജയ്യെ അഭിനന്ദിച്ചത്. പ്രശസ്തിയുടെ കൊടുമുടിയിലാണ് വിജയ് സിനിമവിട്ട് രാഷ്ട്രീയത്തിലിറങ്ങിയതെന്ന് രാംചരണ്‍ പറഞ്ഞു.

'തമിഴ്നാട് മുഖ്യമന്ത്രി ജോസഫ് വിജയ് ഗാരുവിന് എന്റെ അഭിനന്ദനങ്ങള്‍. കരിയറിന്റേയും സ്റ്റാര്‍ഡത്തിന്റേയും ഉന്നതിയില്‍ നില്‍ക്കുമ്പോഴാണ് അദ്ദേഹം പൊതുപ്രവര്‍ത്തനത്തിലേക്ക് ഇറങ്ങിയത്. ഒരു സിനിമാക്കാരന്‍ എന്ന നിലയില്‍ എനിക്ക് അഭിമാനമുണ്ട്. തമിഴ്നാട്ടിലെ ജനങ്ങളേയും വിജയ് സാറിനേയും ഞാന്‍ അഭിനന്ദിക്കുന്നു'- രാംചരണിന്റെ പറഞ്ഞു.

നടന്‍ അര്‍ജുന്‍ സര്‍ജയും വിജയ്‌യെ അഭിനന്ദിച്ച് രംഗത്തെത്തിയിരുന്നു.'തമിഴ്നാട്ടില്‍ ഒരുപാട് കാര്യങ്ങള്‍ മാറാനുണ്ട്. തമിഴ്നാട് ഒരുപാട് ഇംപ്രൂവ് ആകാനുണ്ട്. അതിപ്പോള്‍ തമിഴ്നാട് മാത്രമല്ല, ഇന്ത്യയിലെ വ്യവസ്ഥിതി തന്നെ മാറേണ്ടതുണ്ട്. ചെറിയ കാര്യങ്ങള്‍ ഉള്‍പ്പെടെ ഒരുപാട് മാറാനുണ്ട്. ജനങ്ങളെ പറ്റി ചിന്തിക്കണം. ഇപ്പോഴത്തെ ഗവണമെന്റില്‍ എനിക്ക് സന്തോഷമുണ്ട്. പുതിയൊരു സര്‍ക്കാര്‍ എന്താണ് ചെയ്യാന്‍ പോകുന്നത് എന്ന കാര്യത്തില്‍ ജനങ്ങള്‍ക്ക് ഒരു ആകാംക്ഷയുണ്ടാകില്ലേ. ആ ഒരു ആകാംക്ഷ എനിക്കുമുണ്ട്. വിജയ് സാര്‍ അത് വ്യത്യസ്തമായി ചെയ്യും എന്നൊരു വിശ്വാസം എനിക്കുണ്ട്.

വിജയ് വളരെ കുറച്ച് സംസാരിക്കുന്ന ഒരാളാണ്. ലിയോയില്‍ നമ്മള്‍ ഒന്നിച്ച് പ്രവര്‍ത്തിച്ചിരുന്നു. ആ സമയത്ത് അദ്ദേഹവുമായി സംസാരിച്ചിരുന്നു. അതൊരു നല്ല സമയമായിരുന്നു. ആ സമയത്ത് തന്നെ എനിക്കറിയാമായിരുന്നു. ചില ആളുകള്‍ ഭയങ്കരമായി ചിന്തിക്കും. അവര്‍ ഭയങ്കര സൈലന്റ് ആയിരിക്കും. പക്ഷേ ഒരുപാട് കാര്യങ്ങളെ കുറിച്ച് അവര്‍ ചിന്തിച്ചു കൊണ്ടിരിക്കും. അതുപോലെയാണ് വിജയ്. എന്തായാലും നല്ല കാര്യങ്ങള്‍ നടക്കും.

വ്യത്യസ്തമായി എന്തെങ്കിലും ചെയ്യണമെന്ന ആഗ്രഹം അദ്ദേഹത്തിനുണ്ട്. വരുമ്പോഴേ ചെയ്യാന്‍ പോകുന്ന എല്ലാ വിഷയത്തെക്കുറിച്ചും ആരും പറയാറില്ല. ഞാന്‍ ഇതാണ് ചെയ്യാന്‍ പോകുന്നത് എന്ന് ആരെങ്കിലും പറയുമോ?. വന്നതിന് ശേഷം മാത്രമേ ചെയ്യുകയുള്ളൂ. അതുപോലെ അദ്ദേഹം ഇപ്പോള്‍ വന്നു.

അധികം വൈകാതെ അദ്ദേഹം നല്ല കാര്യങ്ങള്‍ ചെയ്യാന്‍ തുടങ്ങുമെന്ന വിശ്വാസം എനിക്കുണ്ട്. കാരണം അദ്ദേഹത്തിന്റെ കയ്യില്‍ ചെയ്യാന്‍ പോകുന്ന കാര്യങ്ങളുടെ എണ്ണമുണ്ട്. വലിയ ഒരു പൊസിഷനിലാണ് അദ്ദേഹം വന്നിരിക്കുന്നത്. ഒരു അഴിമതിക്കോ ഒന്നും ഇടമില്ലാതെയാണ് വന്നിരിക്കുന്നത്'.- അര്‍ജുന്‍ സര്‍ജ പറഞ്ഞു.

Content Highlights: After Vijay was sworn in as the Chief Minister of Tamil Nadu, many film stars came forward to congratulate him. Now, Telugu superstar Ram Charan has also congratulated Vijay.